January 18, 2022

17 emigrantë vdiqën brenda një muaji në Serbi

Shpërndaje lajmin

Brenda një muaji, 17 refugjatë dhe emigrantë vdiqën gjatë tentimit për të arritur në vendet e Bashkimit Evropian, përmes Serbisë, deklaroi komisari serb për Refugjatë dhe Migrantë, Vladimir Cuciç.

Fatkeqësia e fundit ndodhi më 13 dhjetor në Hungari, afër kufirit me Serbinë kur një veturë me targa serbe, në të cilën kishte emigrantë pësoi aksident pasi ngasësi refuzoi të ndalej për kontroll policor.

Në këtë aksident vdiqën shtatë persona, ndërsa katër u lënduan.

Në nëntor, tre të mitur vdiqën e 19 persona të tjerë u lënduan në juglindje të Serbisë, kur një furgon i cili po ashtu barte emigrantë pësoi aksident, transmeton Euronews, përcjell Albinfo.ch.

“Kur shihni numrin e të vdekurve është krejtësisht e qartë sesa dëshpëruese është dëshira e tyre për të vazhduar rrugën”, shtoi Cuciç para gazetarëve.

Cuciç përmendi që më së shumti njerëz të cilët tentojnë të kalojnë kufirin në mes të Serbisë dhe Hungarisë, Rumanisë apo Kroacisë janë nga Afganistani dhe Siria.

Autoritetet në Serbi përpiqen të arrestojnë trafikantët, me ndihmën e të cilëve migrantët tentojnë të arrijnë te shtetet e Bashkimit Evropian.

Më 10 nëntor, në Serbi u arrestuan shtatë persona nën akuza për trafikim të qenieve njerëzore. Në shtator u arrestuan pesë nën dyshimin që për 6 mijë deri në 10 mijë euro ndihmuan së paku 15 emigrantë të kalojnë nga territori i Serbisë në Kroaci dhe tutje në Austri e Gjermani.

Që nga fillimi i krizës me emigrantë në vitin 2015, nëpërmes Serbisë, sipas të dhënave të Komisariatit për Refugjatë, kaluan më shumë se 1 milion njerëz.

Më së shumti njerëz ka nga Afganistani (35%), Siria (22%), Bangladeshi (11%) dhe Pakistani (7%).

 


Shpërndaje lajmin

Leave a Reply

Your email address will not be published. Required fields are marked *