Bytyqi: Kam ambicie për president, mund të jem kandidati konsensual

Zv.kryeministri Fatmir Bytyqi zbuloi se ka ambicie të bëhet president, përcjell albinfo.ch.
Në intervistë për Alsat, Bytyqi tha se ai mund të jetë kandidati konsensual. Bytyqi, i cili mban gjithashtu edhe postin e nënkryetarit të LSDM-së, tha se një numër i konsiderueshëm i degëve të partisë e kanë nominuar atë për kandidat për president.
“Unë po e bëj publike që kam marrë nominim nga disa degë të partisë, sepse dihet publikisht se LSDM-ja është njëra nga  partitë që ka shtrirjen më të gjerë në vend. Kemi 80 degë partiake në vend. Kam marrë nominim nga një numër i konsiderueshëm i degëve nga LSDM-ja. Tani vijon procesi i konsultimeve dhe kjo duhet të mbarojë me kongresin. Nëse kërkohet një kandidat konsensual siç jam unë, do e kisha pranuar një ofertë të tillë. Kurse nëse duhet të bëjmë kompromise të tjera dhe të gjejmë konsensualitet diku tjetër, jam i gatshëm që t’i ofroj dorën gjithkujt që mendon se shtetin duhet të dërgojë atje dhe punojmë për të njëjtin vizion”, theksoi Fatmir Bytyqi, zv.kryeministër dhe nënkryetar i LSDM-së.