Dhunohet një efektiv i forcave ‘Shqiponja’ në Laprakë, mes autorëve një polic nga Vlora

Një efektiv i forcave “Shqiponja” është dhunuar në zonën e Laprakës në Tiranë, mëngjesin e kësaj të diele. Sipas burimeve, mësohet se patrulla e policisë ka ndaluar një mjet për kontroll. Brenda makinës kanë qenë 3 persona.
Ata nuk i janë bindur urdhrit të policisë dhe kanë nisur fillimisht të debatojnë me fjalë me ta e më pas të goditen edhe me grushta.
Mësohet se drejtuesi i mjetit u shoqërua në komisariat. Sipas burimeve, ai rezultoi të ishte punonjës policie në Vlorë, efektiv tek njësia “Shqiponja”.
Për shkak të situatës së krijuar dhe kundërshtimit që u ka bërë kolegëve të Tiranës, bashkë me 2 miqtë vlonjatë që e shoqëronin, në ndihmë kanë shkuar edhe 7 patrulla policie, të cilat kanë neutralizuar situatën.
Efektivit nga Vlora i është sekuestruar arma e shërbimit që e kishte me vete në makinë dhe një thikë.
Agjensia e Mbikqyrjes Policore ka nisur verifikimet për të zbardhur rrethanat e plota të ngjarjes.