Kurti: Serbia solli njerëz me autobusë për ta destabilizuar Kosovën

Kryeministri Albin Kurti ka thënë se ngritja e barrikadave u orkestrua nga Beogradi, ku njerëzit u sollën me autobusë në veriun e Kosovën për qëllime destabilizuese.
Duke folur për gazetën holandeze NRC, Kurti ka dhënë detaje në lidhje me organizimin dhe ngritjen nga ana e serbëve të barrikadave në veri, përcjell Albinfo.ch.
Shefi i Qeverisë së Kosovës shtoi gjithashtu se në mesin e personave të sjellur me autobusë kishte pjesëtarë të maskuar të Brigadës së Veriut, Grupit Wagner dhe Ujqërit e Natës.
“Njerëzit u sollën me autobusë nga Serbia për të udhëhequr barrikadat. Ne kemi prova se këta janë njerëz të maskuar me shenja të milicisë ruse Wagner, Ujqërit e Natës (një bandë ruse motoçikletash besnike ndaj Putinit) dhe të ashtuquajturës Brigadë e Veriut”, ka thënë Kurti.
Ai thekoi se të gjitha provat me foto dhe video janë dokumentuar dhe u janë dërguar organeve ligjzbatuese.
Gjithashtu Kurti shtoi se Prishtina duhet të vendosë sundimin e ligjit në veri të Kosovës.
“Ne do të duhet të vendosim sundimin e ligjit në veri të Kosovës për të trajtuar realisht paligjshmërinë atje”, tha ai./Albinfo.ch/