Lulzim Basha: Qeveria po godet lirinë e medias, kur të vij në pushtet do të anuloj ligjin antishpifje

Share

Kreu demokrat Lulzim Basha ka akuzuar dje qeverinë për presione ndaj medias dhe kufizim të fjalës së lirë. Me rastin e 30-vjetorit të gazetës “Rilindja Demokratike”, Basha ka reaguar në rrjetet sociale, duke thënë se politika gjithmonë ka dominuar mbi median në Shqipëri.

“Historia e 3 dekadave të shtypit të lirë në Shqipëri ka dëshmuar qartë se çdo betejë mes pushtetit dhe medias është fituar nga kjo e fundit. Liria e fjalës dhe informimit ka triumfuar pavarësisht presioneve të çdo lloji dhe përpjekjeve apo kërcënimeve të pushtetit për të mbytur të vërtetën që publikohet nga media. Shqipëria është sot delja e zezë e Europës për lirinë e fjalës dhe të shtypit. Raportet e organizatave ndërkombëtare e rendisin vendin tonë të fundit për lirinë e medias. Mediat janë paditur, gjobitur dhe diskriminuar financiarisht. Gazetarët janë burgosur, dhunuar dhe penguar në ushtrimin e profesionit. Mediat janë bllokuar apo mbyllur me urdhër të kryeministrit. Ndërsa shumë gazetarë janë sulmuar në mënyrë të organizuar nga makineria e propagandës qeveritare”, tha ai.

Një debat i vitit që lamë pas ishte ai i paketës antishpifje. Qeveria hartoi një ligj që ndëshkon me gjoba portalet, por që u kthye nga presidenti dhe u kritikua nga Venecia. Basha ka premtuar se kur të vijë në pushte ky ligj do të anulohet nëse gjen rrugën e miratimit.

“Angazhimi i parë im i parë në funksion të lirisë së fjalës së lirë pas 25 prillit do të jetë anullimi i ligjit të censurës që qeveria në ikje ka përgatitur dhe do ta miratojë pavarësisht kundërshtive të gazetarëve dhe organizatave ndërkombëtare për lirinë e shtypit. Qeverisja e re e dalë nga zgjedhjet e 25 prillit do të punojë ngushtë me gazetarët dhe organizatat për lirinë e medias në për të miratuar statusin e gazetarit në bazë të të cilit funksionon sot profesioni i gazetarit në vendet e BE dhe që përcakton qartë rregullat që nga paga minimale dhe mekanizmat mbrojtës nga çdo lloj presioni”, tha ai.

Basha premtoi standarde europiane për lirinë e medias. “Ne do të punojmë fort që renditja e turpit në raportet ndërkombëtare për lirinë e shtypit në Shqipëri të ndryshojë dhe media shqiptare të renditet aty ku e meriton. Le të jetë ky 30 vjetor, hapi i parë e ndryshimit të madh që do të garantojë standardin europian dhe do t’i japë frymëmarrjen dhe hapësirën e duhur medias dhe gazetarëve”, tha ai.


Share

Komente