Nëse lufta Izrael-Hamas përshkallëzohet, paralajmërohet rritje e çmimit të naftës

0
Shpërndaje lajmin

Banka Botërore gjatë ditës së sotme ka raportuar se çmimet e naftës mund të shkojnë drejt siç u tha “ujërave të paeksploruara” nëse dhuna midis Izraelit dhe Hamasit intensifikohet, gjë që mund të rezultojë në rritje të çmimeve të ushqimeve në mbarë botën.
Sipas raportit të Bankës Botërore janë tre skenarë për furnizimin global të naftës në rast të një ndërprerjeje të vogël, të mesme ose të madhe.
Efektet duhet të kufizohen nëse konflikti nuk zgjerohet në një skenar “përçarje e vogël” – pasi çmimet e naftës pritet të bien në një mesatare prej 81 dollarë për fuçi vitin e ardhshëm, por gjatë një “ndërprerjeje mesatare”, të barabartë me ndërprerjet e përjetuara gjatë luftës në Irak, çmimet e naftës do të rriteshin me afër 35%, përcjell albinfo.ch.
Në një skenar të “ndërprerjes së madhe”, që mund të krahasohet me embargon e naftës arabe të vitit 1973, furnizimi global i naftës do të tkurret me 6 milionë deri në 8 milionë fuçi në ditë dhe çmimet mund të rriten me 56% në 75%, ose 140 deri në 157 dollarë për fuçi.
Kryeekonomisti i Bankës Botërore, Indermit Gill, u shpreh se nëse konflikti do të përshkallëzohej, ekonomia globale do të përballej me një goditje të dyfishtë energjetike për herë të parë në dekada, jo vetëm nga lufta në Ukrainë, por edhe nga Lindja e Mesme.
Në anën tjetër, zëvendëskryekonomisti i Bankës Botërore, Ayhan Kose, ka thënë se çmimet më të larta të naftës do të rezultojnë në mënyrë të pashmangshme në çmime më të larta të ushqimeve.
Disa analistë janë skeptikë se Shtetet e Bashkuara të Amerikës do të përjetonin mungesa masive të naftës, pasi prodhimi i naftës në SHBA është në nivelin më të lartë të të gjitha kohërave.
Drejtori Ekzekutiv i Agjencisë Ndërkombëtare të Energjisë, Fatih Birol ka deklaruar se midis pushtimit të Rusisë dhe luftës midis Izraelit dhe Hamasit në Gaza, askush nuk mund ta bindë se nafta dhe gazi janë zgjedhje të sigurta energjetike për vendet ose konsumatorët.
 

Leave a Reply

Your email address will not be published. Required fields are marked *