Pse Roman Abramovich po përpiqet të ndërmjetësojë në arritjen e paqes Rusi-Ukrainë?

Shpërndaje lajmin

Roman Abramovich është një nga oligarkët më të çuditshëm post-sovjetikë, i cili vështirë se duket i përshtatshëm për të qenë një negociator paqeje në luftën ruso-ukrainase.
Miliarderi 55-vjeçar madje njihet si një i vetmuar që mezi mund të ketë kontakt me sy në një bisedë.
Abramovich fitoi pasurinë e tij gjatë tranzicionit të Rusisë në kapitalizëm në vitet 1990 – dhe zotëroi një fuqi të madhe pas fronit të Kremlinit nga Boris Yeltsin, presidenti i parë post-sovjetik i Rusisë që zgjodhi Vladimir Putinin si kryeministër dhe pasardhës të tij në vitin 2000, shkruan Al Jazeera, përcjell Telegrafi.
Gjatë mandateve të para të Putinit, Abramovich qeverisi Chukotka, një rajon siberian i mbuluar nga ngricat e përhershme, popullsia e të cilit prej më pak se 50,000 banorësh mund të futej lehtësisht në një nga stadiumet ku luante Chelsea, klubi i futbollit në Premier League që ai bleu në vitin 2003.
Abramovich vendosi të shesë klubin në fillim të këtij muaji përpara se Londra dhe Bashkimi Evropian ta sanksiononin dhe ngrinin asetet e tij për “qasjen e tij të privilegjuar” te presidenti rus Vladimir Putin që e ndihmoi atë “të ruante pasurinë e tij të konsiderueshme”.
Të martën, Abramovich u pa duke marrë pjesë në bisedimet e paqes midis Moskës dhe Kievit, më shumë se një muaj pasi Rusia filloi agresionin mbi Ukrainën, në Stamboll, ku u takua me presidentin Rexhep Tajip Erdogan, përcjell Telegrafi
Ky takim erdhi disa ditë pas pretendimeve të paverifikuara për helmimin e tij.
Sipas Wall Street Journal, Abramovich dhe të paktën dy anëtarë të lartë të ekipit ukrainas dyshohet se u helmuan – dhe kishin sy të skuqur, lot të vazhdueshëm dhe lëkurë të qëruar në fytyrat dhe duart e tyre.
Megjithatë, ky pretendim u hodh poshtë shpejt nga zyrtarët e Shteteve të Bashkuara dhe ata ukrainas.
Në lidhje me rolin e tij si ndërmjetësues, Genadi Gudkov, një lider i opozitës ruse në mërgim, i cili shërbeu tri mandate në Dumën e Shtetit, dhoma e ulët e parlamentit të Rusisë, i tha Al Jazeera: “Ai ka një dhunti fantastike për të parë të ardhmen, ai ka një aftësi të veçantë për ta parashikuar atë”.
Veç kësaj, Ukraina gjithashtu thuhet se ka një pikëpamje pozitive për Abramovich.
Wall Street Journal raportoi më 23 mars se presidenti ukrainas Volodymyr Zelenskyy i kërkoi posaçërisht homologut të tij amerikan Joe Biden të mos e shtonte Abramovichin në listën e oligarkëve rusë të sanksionuar, sepse ai “mund të rezultojë i rëndësishëm si një ndërmjetës me Rusinë në ndihmën për të negociuar paqen”.
Gazeta citoi “njerëz me njohuri” për telefonatën Zelensky-Biden që u zhvillua në fillim të marsit.
Shërbimi i shtypit i Zelensky nuk ishte menjëherë i disponueshëm për të komentuar pjesëmarrjen e Abramovich në bisedime, vë në pah Al Jazeera, përcjell Telegrafi.
Por ndërsa udhëheqësi i Ukrainës mund ta kuptojë rolin e tij, disa janë ende të hutuar nga paraqitja e tij në bisedime.
“Kjo është një surprizë e plotë. Unë as nuk di çfarë të them”, tha një politikan nga partia e Zelenskyt për Al Jazeera.
Përgjigja mund të qëndrojë në vendimin që ai mori në fund të viteve 2000 kur përfundoi mandati i tij si guvernator i Chukotka.
Abramovich zgjodhi të shkëputej nga Kremlini dhe një grusht miliarderësh që mbetën në Rusi dhe u përfshinë në projektet ekonomike të Putinit për të transformuar ekonominë përmes kontrollit më të rreptë të qeverisë.
“Ai nuk është thellësisht i integruar në veprimet politike të Putinit. Ai u distancua nga oligarkët e tjerë rusë, u përpoq të bënte emër dhe imazh jashtë vendit”, tregon Gudkov.
Edhe pse përpjekjet nuk i penguan sanksionet, ato e ndihmuan atë të shihej si një figurë e besuar nga të dyja palët.
“Abramovich është një urë lidhëse midis elitave perëndimore dhe ruse”, thotë për Al Jazeera, Aleksey Kushch, një analist me bazë në Kiev.
Ai mendon se oligarkët e tjerë rusë – përfshirë ata që janë ose “të perëndimorizuar” ose “nacionalistë”, “vendas konservatorë” – nuk kanë besim as nga Rusia, as nga Ukraina.
Por “Abramovich i përshtatet të gjithëve”, mendon Kushch.
pranojnë aftësinë e tij për të “lundruar” në rrugën e tij në negociatat më të ndërlikuara.
“Ajo që e bën atë interesant është talenti i tij për të organizuar skema financiare në hije”, ka thënë në vitin 2018, Alexander Korzhakov, ish-shefi i sigurisë së presidentit Yeltsin, i cili ishte në mosmarrëveshje me Abramovich në fund të viteve 1990.
“Por midis biznesmenëve, Abramovich ka qenë gjithmonë i respektuar – ai e mbajti fjalën e tij dhe kurrë nuk grabiti askënd”, theksoi Korzhakov.
Ndërsa i njohur për aftësitë e tij ndërmjetësuese, historia e tij personale është një tragjedi dhe sukses i madh.
Gjyshërit e tij nga nëna ishin hebrenj që u larguan nga Ukraina Sovjetike në Rusi gjatë Luftës së Dytë Botërore, por të dy vdiqën kur ai ishte tre vjeç.
Si adoleshent, ai ishte një shitës ambulant i lodrave plastike në Moskë dhe vazhdoi të bëhej një nga njerëzit më të pasur të Rusisë me interesa në naftë.
Ai mbajti lidhje me biznesmenë hebrenj ukrainas – dhe mund të ketë pasur lidhje me presidentin Volodymyr Zelensky, i cili rrjedh nga një familje hebreje rusisht-folëse.
Megjithatë, të paktën një nga marrëveshjet e tij me biznesmenët ukrainas shkoi tmerrësisht keq.
Presidenti rus pretendoi në vitin 2014 se oligarku ukrainas Ihor Kolomoisky “mashtroi” Abramovich “dy ose tre vjet më parë”.
Anticor ukrainas që specializohet në raportimin e korrupsionit pretendoi se marrëveshja të cilës i referohej Putin ishte përpjekja e Abramovich për të blerë pesë fabrika nga Kolomoisky në vitin 2007.
Pas sanksioneve goditëse, këta janë oligarkët rusë që (s’)po flasin kundër agresionit të Putinit në Ukrainë
Pas sanksioneve goditëse, këta janë oligarkët rusë që (s’)po flasin kundër agresionit të Putinit në Ukrainë
Zelensky, i cili ishte një nga komedianët dhe producentët televizivë më të suksesshëm të Ukrainës përpara ngritjes së tij në pushtet, ishte gjithashtu i lidhur ngushtë me Kolomoisky.
Për vite me radhë, trupa e tij komike e District 95 drejtoi një shfaqje televizive në një kanal televiziv të kontrolluar nga Kolomoisky dhe fushata presidenciale e Zelensky u mbështet gjerësisht nga të gjitha mediat miqësore me Kolomoisky.
Të dy, megjithatë, patën një mosmarrëveshje graduale – diçka që e ndihmoi Zelenskyn të rriste vlerësimin rreth tij si një kampion kundër korrupsionit. /Telegrafi/
Shkrim i publikuar në Al Jazeera, përkthyer dhe përshtatur nga Hakim Kasami

Leave a Reply

Your email address will not be published.