November 29, 2021

“Shkelje e pafalshme”, ILD kërkon masë disiplinore ndaj dy gjyqtarëve të Apelit të Vlorës

Shpërndaje lajmin

Këshilli i Lartë Gjyqësor dëgjoi kërkesën e Inspektorit të Lartë të Drejtësisë, Artur Metani për ulje rroge me 40% ndaj gjyqtarëve të Apelit të Vlorës, Petrit Aliaj dhe Nazmi Troka. Aliaj dhe Troka kundërshtuan masën. 

Gjyqtari Petrit Aliaj (djathtas, në këmbë), gjyqtari Nazmi Troka dhe Inspektori i Lartë i Drejtësisë Artur Metani (majtas). Foto kortezi nga ILD.

Këshilli i Lartë Gjyqësor shqyrtoi të hënën kërkesën e Inspektorit të Lartë të Drejtësisë për masë disiplinore me ulje 40 për qind të pagës për 1 vit për gjyqtarët e Apelit të Vlorës Petrit Aliaj dhe Nazmi Troka.

Të dy procedohen për marrjen e një vendimi, për rishikim mase sigurie, që sipas ILD-së është marrë në kundërshtim me Kodin e Procedurës Penale.

ILD akuzon Aliajn, i pezulluar nga detyra për shkak të vendimit të shkarkimit nga Komisioni i Pavarur i Kualifikimit dhe Trokën për sjellje të papërshtatshme që “ka cënuar imazhin e drejtësisë dhe ka ulur besimin e publikut tek drejtësia”.

Në seancë u vu në dukje se kjo çështje ishte arkivuar nga ish-Këshilli i Lartë i Drejtësisë, por pas ankimit nga qytetarit viktimë e pengmarrjes, një komision me tre anëtar i KLGJ-së kishte vnedosur riçelje të procedimit disiplinorë.

Kryetarja e KLGJ Naureda Llagami tha se anëtari i KLGJ-së Ilir Toska kishte dhënë dorëheqjen nga çështja. Po ashtu tre anëtarët e komisionit që kishte rihapur çështjen, Alban Toro, Fatmira Luli dhe Dritan Hallunaj nuk ishin pjesë e shqyrtimit.

Fillimisht këshilli dëgjoi Inspektorin e Lartë të Drejtësisë Artur Metani, i cili referoi se dy gjyqtarët kishin shkelur një dispozitë të Kodit të Procedurës Penale e cila nuk kishte nevojë për interpretim. Metani vuri në dukje se vendimi i Gjykatës së Apelit në Vlorë, për të lënë në fuqi masën e rishikuar të sigurisë ndaj një të akuzuari për heqje të paligjshme të lirisë në vitin 2016, ishte prishur nga Gjykata e Lartë e cila po ashtu kishte shënuar tërheqje vëmendje për gjyqtarët e Apelit të Vlorës.

Nga relatimi u kuptua se vendimi i rishikimit të masës së sigurisë ishte marrë në shkelje të ligjit në Gjykatën e Faktit, pasi nuk ishte shqyrtuar nga trupa që po gjykonte çështjen në themel, por nga një gjyqtarë i gatshëm në gusht 2016. Gjykata e Apelit trupa në të cilën ishin Aliaj dhe Troka ka lënë në fuqi këtë vendim dhe sipas Metanit kjo është një shkelje e pafalshme për magjistratë me atë eksperiencë.

Në parashtrimet e tyre dy gjyqtarët e lanë evazive nëse e kishin bërë apo jo shkeljen, por kundërshtuan masën e kërkuar, heqje të 40 për qind të pagës, si shumë të ashpër.

Aliaj, i cili u shkarkua nga Komisioni i Pavarur i Kualifikimit në qershor 2020 pasi u gjet me pasuri të pajustifikuara, pretendoi në fillim të seancës së KLGJ kishte dërguar informacion të rremë në lidhje me gjendjen e tij shëndetësore dhe praninë e tij në gjykatë në fillim të qershorit. “Për shkak të atij informacioni unë u shkarkova”, tha Aliaj.

Ai këmbënguli më pas se vërejtja e marrë nga Gjykata e Lartë në lidhje me vendimin për të cilin kërkohej masa disiplinore ishte e mjaftueshme dhe e cilësoi të ekzagjeruar kërkesën e ILD për të hequr 40 për qind të pagës. “Ne për atë të shkretë rroge po punojmë”, tha Aliaj.  Aliaj është i pezulluar nga detyra, por vijon të paguhet deri sa vendimi për të marrë formë të prerë apo të prishet në Kolegjin e Posaçëm të Apelimit.

Ai po ashtu këmbënguli se i ishte cënuar e drejta e anikimit nga KLGJ.

Ndërkohë Troka tha se masa disiplinore e kërkuar ishte jo proporcionale, ndërsa këmbënguli se nuk kishte pasur rregullim të qartë për rastin në fjalë dhe se masat e sigurisë në muajin gush ishin bërë nga gjyqtarët e gatshëm edhe për shkak të afateve ligjore. Troka tha se parashikimi ligjorë në këtë rast ishte që masat e sigurisë gjatë kohës së gjykimit merreshin nga trupa që shqyrton çështjen në themel, por nuk kishte përjashtim që ndalonte gjyqtarët e gatshëm.

Të pyetur nga Metani nëse pranonin që kishin bërë shkelje, dy gjyqtarët ishin evazivë. Aliaj megjithatë tha se ai pranonte vendimin e Gjykatës së Lartë dhe vërejtjen që kishte marrë prej saj. “Vendimi është marrë ne e respektojmë”, tha ai, ndërsa shtoi se masa nuk ishte proporcionale.

Anëtarja e KLGJ-së Brikena Ukperaj i kërkoi Metanit qëndrim në lidhje me masën e kërkuar, duke komentuar se procedura ka ndodhur në kohën e pushimeve dhe se normalisht masat në këtë periudhë merreshin nga gjyqtarë të gatshëm. Metani këmbënguli se shkelja ishte e tillë që nuk mund tu ndodhte gjyqtarëve me atë nivel eksperience dhe se për këtë ajo ishte bërë me dashje.

Po ashtu ai tha se procedimi disiplinor në KLGJ ishte i ndryshëm dhe nuk përplasej me masën që KPK kishte marrë ndërkohë ndaj Aliajt. Pas konsultimeve me dyer të mbyllura KLGJ njoftoi shtyrje të seancës për në datën 25 tetor.


Shpërndaje lajmin

Leave a Reply

Your email address will not be published. Required fields are marked *