April 18, 2021

Sot vendosen masa të reja në Maqedoninë Veriore

Shpërndaje lajmin

Organet kompetente gjatë ditës së sotme do të vendosin nëse do të vazhdohet ora policore. Sipas ministrit të Shëndetësisë, gjithçka do të varet nga situata epidemiologjike dhe nga rezultatet të cilat i ka dhënë deri më tani kjo masë, përcjell albinfo.ch.

Sot në ora 05.00 të mëngjesit ka përfunduar ora policore, pas çka organet kompetente të vendit duhet të vendosin nëse dhe çfarë restriksione do të ketë, respektivishtë nëse edhe më tej do të ketë orë policore ose ndonjë masë tjetër parandaluese kundër frenimit të COVID-19.

Vendimit do t’i paraprijë analiza e trendit të infektimeve të reja gjatë 12 ditëve të kaluara, ku të dhënat e MSH-së gjatë kësaj periudhe ishin nga 284 deri në 1.299 të prekur të rinj. Ministri i Shëndetësisë, Venko Filipçe, kohë më parë nuk e përjashtoi mundësinë e vendosjes së masave plotësuese restriktive nëse masat aktuale nuk do t’i prodhonin rezultatet e dëshirueshme.

“Ne jemi të gatshëm të marrim edhe masa restriktive shtesë në qoftë se këto aktuale nuk i japin rezultatet e dëshiruara”.

Qëllimi i orës policore ishte që të kufizohet lëvizja dhe komunikimi i të rinjve nëpër parqe, sipërfaqe publike dhe lokale pas mbylljes së objekteve hotelerike, ku ishte konstatuar se ata janë një ndër transmetuesit kryesorë të virusit.  Ministria e Punëve të Brendshme ka informuar qytetarët se po vazhdon me aktivitetet për zbatimin e masave për mbrojtje nga koronavirusi.

Nga ky institucion thonë se mbrëmë janë konstatuar 28 shkelje të orës policore, ndërsa janë dhënë edhe 369 gjoba për mosmbajtje të maskës mbrojtëse. MPB u bën thirrje qytetarëve që t’i respektojnë masat dhe protokollet e miratuara nga Qeveria për parandalimin e Covid-19.


Shpërndaje lajmin

Leave a Reply

Your email address will not be published. Required fields are marked *